နာဂဒေသ သီတဂူစက္ခုဒါနအလှူတော်

ပြည်တွင်းပြည်ပ သာသနာပြု သီတဂူဆရာတော်ကြီးသည် ကျန်းမာရေးအထူးပြု အလှူတော်များ လှူလျှက်ရှိရာ အထူးအားဖြင့် မျက်စိအလှူတော်များ ပြုလုပ်ရာတွင် မြန်မာနိုင်ငံ နေရာအနှံ့အပြား အရောက်သွားတော်မူသည်။ သီတဂူစက္ခုဒါန၊ သီတဂူအာရောဂျဒါန အစရှိလျှက် သီတဂူဆေးရုံတော် (၂၁) ရုံအထိ လှူဒါန်းပြီးဖြစ်သည်။ ဒီလအတွင်းမှာပဲ ဧရာ၀တီတိုင်း ပန်းတနော် (အစုကြီးကျေးရွာ) သီတဂူသုမေဓာဆေးရုံကို ၂၃-၄-၂၀၁၃နေ့က ဖွင့်လှစ်ခဲ့သည်။ မွန်ပြည်နယ်၊ ကျိုက်ထိုမြို့ သီတဂူစက္ခုဒါနဆေးရုံများကိုလည်း ဆက်လက် ဖွင့်လှစ် လှူဒါန်းမည်ဖြစ်သည်ဟု သိရသည်။

နာဂဒေသ (လဟယ်) မျက်စိအလှူ
 ၁၈-၄-၂၀၁၃နေ့က ဆရာတော်ကြီး ဦးဆောင်သော အဖွဲ့သည် မြန်မာနိုင်ငံ၏ အနောက်မြောက် အစွန်အဖျား နာဂတိုင်းရင်းသားများ ရှိရာ စစ်ကိုင်းတိုင်း၊ နာဂဒေသအထိ သွားရောက်ပြီး ကျန်းမာရေးစောင့်ရှောက်မှုများ ပြုလုပ်သည်၊ မျက်စိအလှူများ ပြုလုပ်ပေးသည်။ ထိုဒေသရှိ လဟယ်ပြည်သူ့ဆေးရုံတွင် သီတဂူဆရာတော်ကြီးနှင့် အဖွဲ့က ဆေးရုံသုံးပစ္စည်းများ၊ သီတဂူစက္ခုဒါနဆေးရုံ အဆောက်အဦးများ လှူဒါန်းထားသည်ကို တွေ့ရသည်။

၁၈-၄-၂၀၁၃နေ့မှ ၂၀-၄-၂၀၁၃ရက်နေ့အထိ လဟယ်ပြည်သူ့ဆေးရုုံတွင် မျက်စိအထူးကုဆရာ၀န်ကြီးများ ဖြစ်ကြသော ဒေါက်တာမြအောင်၊ ဒေါက်တာပွင့်ဦးနှင့် သီတဂူမျက်စိဆရာ၀န် ဒေါက်တာဒေါ်မိမိခင်၊ ဒေါက်တာမင်းသီဟနှင့် သီတဂူအာယုုဒါနဆေးရုုံမှ သူနာပြု (၆)ဦးတိုု့က မျက်စေိ၀ဒနာရှင်ပေါင်း (၂၀၂)ယောက် စမ်းသပ်စစ်ဆေးသည်။ (၂၂ )ယောက် ခွဲစိတ်ကုသပြီး မျက်စိအလင်းများ ပေးလှူခဲ့သည်။

မျက်စေိ၀ဒနာရှင်များသည် ထိုဆေးရုံသို့ ရောက်ဖို့ရန် လမ်းခရီး (၃)ည အိပ်ရသည်ဟု ဆိုသည်၊ ဤမျှလောက် ေ၀းလံခေါင်သော ထိုဒေသရှိ တိုင်းရင်းသားများသည် ဆရာတော်ကြီး၏ မေတ္တာ၊ ကရုဏာများကို ရရှိကြသည်၊ ဆရာတော်ကြီး၏ ဓမ္မစကား ကြားနာခွင့်ရသည်မှာ သီတဂူဆရာတော်ကြီး၏ လူသားအပေါ် ထားသည့် မေတ္တာ ကရုဏာတော်များနှင့် သူတို့၏ ကံကောင်းခြင်းများဖြစ်ကြသည်။ ဆရာတော်ကြီး၏ ထိုခရီစဉ်အတွက် အဆင်ပြေစေရန် နိုင်ငံတော်မှ ရဟတ်ယဉ်လှူဒါန်းသည်ဟုလည်း သိရသည်။

သီတဂူအာယုပါလ ကုသိုလ်ဖြစ်ဆေးခန်း (မြင်းခြံ)

မြင်းခြံမြို့ အာယုပါလ ကုသိုလ်ဖြစ်ဆေးခန်း ကို သီတဂူဆရာတော်ကြီးနှင့် တပည့်ဒကာ ဒကာမများက သိန်းပေါင်း ၃၅၀၀ (သုံးထောင် ငါးရာ) ကျော် အကုန်ကျခံ၍ ၁၃၇၄ ခု (၁-၉-၂၀၁၂) ဝါ ခေါင်လပြည့် မေတ္တာအခါတော်နေ့တွင် ဖွင့်လှစ် လှူဒါန်းခဲ့သည်။

(က) ဆေးရုံအဆောက်အဦး- ကျပ်သိန်းပေါင်း (၂၀၀၀) နှစ်ထောင်ကျော်
 (ခ) ဆေးပစ္စည်းများ ကျပ်သိန်းပေါင်း (၁၅၀၀) တစ်ထောင့်ငါးရာကျော်
 (ဂ) ဆေးရုံအဆောက်အဦး အလှူရှင်- ဦးစွန်တိတ်+ ဒေါ်လွမ် (အာရှတော်၀င်နှင့် တော်၀င်ဆေးခန်းပိုင်ရှင်) မိသားစု၊ ရန်ကုန်မြို့

ယခုဖွင့်လှစ်ပြီးသော သီတဂူ အာယုပါလကုသိုလ်ဖြစ်ဆေးခန်း (မြင်းခြံ)သည် သီတဂူသာသနာပြုအဖွဲ့၏ ၁၈ ခုမြောက် ဆေးရုံတော် အလှူဖြစ်သည်။ ထိုဆေးခန်း ဖွင့်အပြီးမှာပဲ နိုင်ငံခြား မျက်စိပါရဂူများနှင့် မြန်မာ မျက်စိပါရဂူများ၊ သီတဂူဆေးရုံဆရာ ဆရာမများက မျက်စေိ၀ဒနာရှင်ပေါင်း ၃၀၀ ကျော်ကို ခွဲစိပ်ကုသပေးခဲ့သည်။

မြင်းခြံထောင်အလှူ

တစ်ဆက်တည်း ထိုမေတ္တာ အခါတော်နေ့မှာပဲ မြင်းခြံမြို့ရှိ မြင်းခြံထောင်တွင် သီတဂူ ကရုဏာအလှူများ ပြုလုပ်သည်။ အကျဉ်းကျခံ ထောင်သားများနှင့် ၀န်ထမ်းများ အားလုံး ၁၀၀၀ (တစ်ထောင်) ကျော် တို့အား သိန်းပေါင်း ၅၀ အကုန်ကျခံကာ လှူဒါန်းရာ၀ယ် မန္တလေးသီတဂူ ကျောင်းအမကြီး ဒေါ်ညွှန့်ညွန့်အေးနှင့် သီတဂူဒေါက်တာမြတ်သူတို့က လှူဒါန်းကြသည်။
ဆရာတော်ကြီး၏လမ်းညွှန်မှု့နှင့် မျက်စိအထူးကု ဆရာ၀န်ကြီး ဒေါက်တာမြအောင် ဦးဆောင်သော မျက်စိအထူးကု ဆရာ၀န်များသည် ထောင်သားများအား မျက်စိ စစ်ဆေးပေးပြီး လိုအပ်သော ကုသမှု့တွေကို ပြုလုပ်ပေးခဲ့ပါသေးသည်။